Sézon grenn ja la ké wara, tandé,
Wara dendé, ké tchou fandé,
Li gannyen parépou,
Ké komou,
Tété zòt dwèt,
Kou zòt divèt!

Souplé, alé sasé wara,
É mété l’annan zòt pagra !

Alé a bitasyon,
A latradisyon,
Fè roun mayouri,
Asou Sennmari …(Matouri, Monjoli, Gran Santi, Kanmopi, Montsinéri, Senteli, Wannari…)
Panga zépin anba pyé,
É manké néyé!

Souplé, alé sasé wara,
É mété l’annan zòt pagra !

Ké zòt zanmi, a dégra,
Pliché, pilé, dékalé wara,
Sézon grenn koumansé,
Bouyon wara ka balansé,
Asou difé, mété chodyè, ké kanari
Zòt pouvé vanté ké walwari!

Souplé, alé sasé wara,
É mété l’annan zòt pagra !

Pa bliyé zépina bati, bichoyak-ya,
Zòt pouvé trapé bòd l’Oyack,
So vyann salé, so poson boukannen ,
So ti moso larfimen,
Pou zòt pwé rété dibout,
A sa ki tout!

Souplé, alé sasé wara,
É mété l’annan zòt pagra !

Tanbou-a ja paré,
Ti bwa ka frapé,
Chacha ka sonnen,
Pyanno savann ka désann dipi bonmanten,
Piman kakarat ka boulé,
Pran roun ti fé!

Souplé, alé sasé wara,
É mété l’annan zòt pagra !

Lannwit ka rivé,
Pou zòt pouvé révé,
Lafèt pé kontinwen,
Jouk bonmanten,
Zòt pouvé monté,
Sézon grenn rivé!

Souplé, alé sasé wara,
É mété l’annan zòt pagra !

Brigitte Ayné alias Brijiit Cayuza